zazpi astoren gainean

Festatan, bertsoak tope

Administrator — Wed, 22 Jul 2009 06:55:23 +0000

Saio asko izan dira aurtengo festatan ere, ofizialak… eta ez hain ofizialak. Onenak, txosnako barra ertzean edo Tontokaleko harrian eserita botatakoak haizeak eraman ditu. Errepika ezinak izaki entzun zituenaren oroimenak bakarrik gordeko ditu.
Beste batzuk bildu, grabatu, egin ditugu eta sarean ere badaude. Karmen egunez Inaxio Begiristain Kultur Etxea tope beteta giro ederrean saio bikaina egin zuten Andoni Egañak, Amaia Agirrek, Aitor Sarrriegik eta Amets Arzallusek.
Hurrengo egunean jubilatuen hamaiketakoan Unai Agirrek eta Aitor Mendiluzek egin zuten saioa librean. Bi hauetako bertsoaldiak daude entzungai bertsoplaza.tv web atarian.
Horren adibide gure orrira ekarri degun Andoni Egañaren agurra. Bertsolariek behin eta berriz aitortu zuten Alegian dagoen bertso mugimendu ederra, eta hemen bere hasierako agurrean txapeldunarena.

Txapela buruan… iturria gainezka

Administrator — Wed, 03 Jun 2009 12:13:09 +0000

Poziturriak aipatzen ziren aurreko postean, Bigarrengo honetan posterik jo gabe gola sartu eta gaztetxok pozaren iturria gainezka jarri dutela aipatu beharko da . Donostiako Manteo kiroldegian, Gipuzkoako Eskolarteko Bertsolari txapelketan, irabazle izan zen gure taldea.
Alex Goikoetxea, Haritz Mujika eta Aratz Irazustabarrena bertako bertsolariei eta dagokien beste guztiei, Iker, Amaia… ZORIONAK
Ondo pasatzea zen helburu, gozatu eta gozarazi ziguten bertaratutakoei eta gainera sariz kargatuta bueltatu ginen. Gaztetxoen bertso eskolako irteera moduan arratsalde pasa egin genuen, trenean joan etorria, gero saioa eta bukatzeko afaria. Egun konpletoa, zertarako gehiago eskatu?
Hemen dago saioa Zumarrago-Urretxuko bertso eskolakoei esker, bere zubertsotan.net orrian beste gauza interesgarri askokin batera agertzen baita.
Helduen mailan Imanol Irazustabarrenak kantatu zuen, papera txukun bete eta besteek bezela mejoratzeko marjena badagoela erakutsi zuen. Hala hobeto, bestela zertarako dago bertso eskola? Nun gozatuko genuke zer ikasirik, zer eginik ez bagenu?

Biba gu!!!!

Administrator — Sat, 23 May 2009 20:46:21 +0000

Azken aldian bertso-eskola poz iturri amaigabe bihurtu zaigu. Lehenbizi, BertsolarHITZA desafioa irabazi genuen; ondoren Mikel Artolak Osinaldeko finalean entzulearen saria jaso zuen eta orain….Eskolarteko Bertsolari Txapelketako Final Haundira pasa dira asto txikienak!!!

Txikien mailan (14 urtera arte), taldeka neurtzen dira. Asteasu-Alegi taldea atera dugu, bertsolari HAAAUUUUNDI hauekin: Alex Goikoetxea, Aratz Irazustabarrena eta Haritz Mugika (erdi alegitarra, ama herritarra da eta).

Helduen mailan (14-18 urte) Imanol Irazustabarrena (ponitik astorako bidean) finalerako sailkatu da, eta Iñaki Artola finalaren ateetan geratu da, bederatzigarrena izan delarik, finalean sartzeko puntu erdi baten faltan. (Pena nik izan beharra / bederatzigarrena.)

Ikusgai duzue joan den ostiralean Beasaingo Usurbe aretoan txikienek egin zuten saioa.

Finala, Maiatzak 29 Ostirala arratseko 16:00n, Donostian Zurriola Auzoko Mantero polikiroldegian. Guztiak gonbidatuta zaudete astoak animatzera!!

P.D. Bertso mundu gaiztoko zurrumurru are gaiztoagoek diote Egañak bere erreinaldia arrixkuan ikusi duela Alegia-Asteasuko taldearekin…

Biba GU!!!

Zorionak Mikel!!

Administrator — Mon, 27 Apr 2009 13:47:22 +0000

Zoriontsu gaude astook. Eta alai. Eta arro. Ez baita gutxiagorako.

Mikel Artola bertso eskolako kideak entzuleek emandako saria irabazi zuen joan den larunbatean Gabiriako Osinalde sarian. Txapelketa garrantzitsua da berau, momentuko bertsolari gazte onenek kantatzen dutelarik bertan. Lehenik, finalerako sailkatzea lortu zuen Mikelek, eta ondoren, behin finalera iritsita, zeukan guztia eman zuen bertaratu ginenon gozagarri.

Maddalen Arzallus, Hodei Barroso, Jone Uria, Miren Amuriza, Arrate Illaro eta Mikel bera aritu ziren kantuan. Arzallusek irabazi zuen txapelketa, Amurizak bertso onenaren saria eskuratu zuen eta Artolak entzuleek emandako saria, saio eder baten ondoren.

Ez da baina Mikelek sari bat eskuratzen duen lehen aldia. Ihaz Alegiko bertso-paper lehiaketa irabazi zuen, Anorexiari jarriak izeneko bertso sortarekin. Hemen duzue bertso-sorta. Kantuan Mikel bera, Gari Zubillaga eta Beñat Garmendia Etxetxuri; musikariak Antonio Zubillaga, Manex Elola, Irati Garmendia eta Julen Goikotxea. Gozatu.

Zorionak bihotz bihotzez Mikel. Zerbeza bat zor diguk!!

Alegi txapeldun!!

Administrator — Wed, 08 Apr 2009 08:51:57 +0000

Amaitu da bertsolarHITZA bertso desafioa. Hiru herrik hartu dugu parte (Ibarra, Altzo eta Alegi), eta lehengo larunbatean jokatu genuen final handia Ibarrako Gaztetxean, Alegiko eta Altzoko taldeen artean.

Alegiko taldetik Felixek, Imanolek, Zaztarrek eta Ikerrek kantatu genuen (Beñat, gogoan zaitugu!!), eta Altzotik, Laso, Olano, Adur eta Etxordek osaturiko taldea joan zen Ibarrara. Saio bikain baten ondoren Alegiko taldea izan zen txapeldun, berdinketa hausteko saio eta guzti.

Dena oso ondo atera zen, eta desafioak merezi bezelako amaiera izan zuen. Eta noski, txapeldunok ospatu genuen gau luze luze batean!! Ea hurrengo urtean herri gehiago animatzen diren.

Denbora asko itxaroten egondako zerbait pasatzen den guztietan gertatzen den bezela, hutsune bat geratu zaigu barruan; egun handi bat bizi eta pasa izanaren oroimen melankoliko bat. Berau goxatzeko, saioaren laburpen zabala ikusi nahi duzuenok klikatu hemen. Zorionak denoi!! Mundialak gera!!

Erregea eta Bufoia

Administrator — Sat, 04 Apr 2009 09:18:33 +0000

Bi astetan zehar Euskal Herria zeharkatu ondoren, bihar iritxiko da Korrika Gasteizera. Alperragoentzat baina, Korrika Kulturalak hainbat ekitaldi ezberdin antolatu ditu hilabete hauetan.

Hoietako bat izan da Erregea eta Bufoia emanaldi berezia, bertsolaria versus antzezlea. Jakina da bertsolariek (ia) beti inprobisatu egiten dutela. Kasu honetan, antzezleak ere inprobisatu egingo du, aurrez prestaturiko pertsonaia batzuen gainean.

Ekitaldi bitxi eta ezohikoa, bi arte mota ezberdin uztartzen dituena. Tuteran izandako saio honetan, Erregea Unai Iturriaga da, Bufoia Ander lipus eta gai-jartzailea Unai Elizasu.

Erregea ala Bufoia, nork irabaziko ote du hitzaren borroka honetan?

Hurrengo geltokian

Administrator — Tue, 24 Mar 2009 22:58:28 +0000

Maialen Lujanbiok badu kopla sorta mundial bat, kopla berriak hurrengo geltokiari jarriak izenekoa.

Kasu honetan Azkoitiko Gaztetxean, Matadeixen, kantatu zituen AHT-aren aurkako ekitaldi batean, Joseba Tapia lagun zuelarik.

Baina gaurkoan ez dugu kopla sorta hau entzungo, beraren aurkezpena baizik. Funtziotan lehendakari den Juan Joxe Ibarretxek aurkeztu zuen jaialdia. Ez duzuela sinesten?? Ea, ikusi, ikusi…

Zeinek daki nor den Ibarretxe?? Asmatzen duenari, Txomin Garmendiak DV-n idatzitako artikuluekin osatutako liburua opari!!

Agurra

Administrator — Sun, 15 Mar 2009 15:18:13 +0000

Gure bloga erabat utzita izan dugun honetan, ia berriro martxa pixkat hartzerik badugun.

Horretarako, Iker Iriarte bertsolari haundiak Alegiko Gaztetxeko plaza berdingabean botatako agur ezin hobe bat aukeratu dugu.

Zurrumurruek diote 2013ko Txapelketa Nagusia prestatzen hasia dela, horretarako astean bi hiru aldiz entrenatzen delarik, izkutuan eta sekretuan. Agur honek garbi erakusten duenez, bere lana ari da fruituak ematen. Bien bitartean, gozatu Iriarteren patxara, patxaran (la navarra) eta klasearekin.

Dr Jeiki & Mr Jai

Administrator — Tue, 21 Oct 2008 18:49:19 +0000

Tontokaletik Dr.Jekill eta Mr.Hyde-n aipamena iritsi zaigunez, guk gure bertsio propioa proposatuko dugu; Dr. Jeiki eta Mr. Jai, aurtengo Ekainaren 13an Durangoko Plateruenea kafe antzokian grabatua.

LSD-a eta Speeda, Jeltzaleak eta Bruce Lee, psikopatologiak eta errealitatea… Argi ibili!!!

Katamalo

Administrator — Wed, 08 Oct 2008 09:25:42 +0000

Bihotz Bakartien Kluba azken kontzetuak ematen ari den honetan, Maialen Lujanbiok idatzitako Katamalo bertsokanta dakarkigu. Gu ta Gutarrak taldeak apirilaren 11n Larrabetzuko Gaztetxean emaniko kontzertuan B.B.K izan zen talde gonbidatua, eta besteak beste kantu zoragarri hau eskeini zuten.

Irlandar aireak dituen bertsokanta da honakoa, eta ikusiko duzuenez, besteek esaten dutenaz eta uste dutenaz Lujanbiok pentsatzen duena azaltzen du. Ikasi eta gozatu!!